ਹਿੰਦ ਮਹਾਂਸਾਗਰ 'ਚ ਤਣਾਅ: ਅਮਰੀਕੀ ਹਮਲੇ ਤੋਂ ਪਹਿਲਾਂ ਇਰਾਨੀ ਯੁੱਧ ਪੋਤ ਨੇ ਭਾਰਤ ਤੋਂ ਮੰਗੀ ਸੀ ਮਦਦ, ਕੋਚੀ 'ਚ ਲਾਇਆ ਲੰਗਰ

ਹਿੰਦ ਮਹਾਂਸਾਗਰ ਵਿੱਚ ਇਰਾਨੀ ਯੁੱਧ ਪੋਤ 'ਤੇ ਹੋਏ ਭਿਆਨਕ ਹਮਲੇ ਤੋਂ ਪਹਿਲਾਂ ਇਰਾਨ ਦੇ ਇੱਕ ਹੋਰ ਯੁੱਧ ਪੋਤ IRIS ਲਵਨ (IRIS Lavan) ਨੇ ਭਾਰਤ ਤੋਂ ਮਦਦ ਦੀ ਗੁਹਾਰ ਲਗਾਈ ਸੀ। ਸੂਤਰਾਂ ਅਨੁਸਾਰ, ਭਾਰਤ ਨੇ ਇਸ ਯੁੱਧ ਪੋਤ ਨੂੰ ਕੋਚੀ ਵਿੱਚ ਰੁਕਣ (ਡੌਕਿੰਗ) ਦੀ ਇਜਾਜ਼ਤ ਦੇ ਦਿੱਤੀ ਹੈ। ਇਸ ਜਹਾਜ਼ ਦੇ ਸਾਰੇ 183 ਕਰੂ ਮੈਂਬਰਾਂ ਨੂੰ ਕੋਚੀ ਸਥਿਤ ਭਾਰਤੀ ਨੌਸੈਨਾ ਦੇ ਕੰਪਲੈਕਸ ਵਿੱਚ ਸੁਰੱਖਿਅਤ ਰੱਖਿਆ ਗਿਆ ਹੈ।

ਜਾਣਕਾਰੀ ਮੁਤਾਬਕ 28 ਫਰਵਰੀ ਨੂੰ ਇਸ ਯੁੱਧ ਪੋਤ ਵਿੱਚ ਕੁਝ ਤਕਨੀਕੀ ਖ਼ਰਾਬੀ ਆ ਗਈ ਸੀ, ਜਿਸ ਤੋਂ ਬਾਅਦ ਇਰਾਨ ਨੇ ਭਾਰਤ ਨਾਲ ਸੰਪਰਕ ਕੀਤਾ। 1 ਮਾਰਚ ਨੂੰ ਭਾਰਤ ਵੱਲੋਂ ਮਨਜ਼ੂਰੀ ਮਿਲਣ ਤੋਂ ਬਾਅਦ, IRIS ਲਵਨ 4 ਮਾਰਚ ਨੂੰ ਕੋਚੀ ਬੰਦਰਗਾਹ 'ਤੇ ਪਹੁੰਚ ਗਿਆ। ਇਹ ਯੁੱਧ ਪੋਤ ਇਸ ਖੇਤਰ ਵਿੱਚ 'ਇੰਟਰਨੈਸ਼ਨਲ ਫਲੀਟ ਰਿਵਿਊ' ਲਈ ਆਇਆ ਹੋਇਆ ਸੀ।

ਦੂਜੇ ਪਾਸੇ, ਸ੍ਰੀਲੰਕਾ ਦੇ ਨੇੜੇ ਅੰਤਰਰਾਸ਼ਟਰੀ ਪਾਣੀਆਂ ਵਿੱਚ ਇਰਾਨੀ ਯੁੱਧ ਪੋਤ IRIS ਡੇਨਾ (IRIS Dena) ਨੂੰ ਇੱਕ ਅਮਰੀਕੀ ਪਣਡੁੱਬੀ ਨੇ ਟਾਰਪੀਡੋ ਹਮਲੇ ਵਿੱਚ ਡੁਬੋ ਦਿੱਤਾ ਹੈ। ਮੱਧ ਪੂਰਬ ਵਿੱਚ ਚੱਲ ਰਹੀ ਜੰਗ ਦਰਮਿਆਨ ਇਹ ਇੱਕ ਬਹੁਤ ਵੱਡੀ ਘਟਨਾ ਮੰਨੀ ਜਾ ਰਹੀ ਹੈ। IRIS ਡੇਨਾ ਅਤਿ-ਆਧੁਨਿਕ ਮਿਜ਼ਾਈਲਾਂ ਅਤੇ ਤੋਪਾਂ ਨਾਲ ਲੈਸ ਸੀ ਅਤੇ ਆਂਧਰਾ ਪ੍ਰਦੇਸ਼ ਦੇ ਵਿਸ਼ਾਖਾਪਟਨਮ ਵਿੱਚ 'ਮਿਲਾਨ ਨੌਸੈਨਾ ਅਭਿਆਸ' ਵਿੱਚ ਹਿੱਸਾ ਲੈ ਕੇ ਵਾਪਸ ਇਰਾਨ ਜਾ ਰਿਹਾ ਸੀ।

ਟਾਰਪੀਡੋ ਹਮਲੇ ਕਾਰਨ ਇਹ ਜਹਾਜ਼ ਸਮੁੰਦਰ ਵਿੱਚ ਗਰਕ ਹੋ ਗਿਆ, ਜਿਸ ਵਿੱਚ ਘੱਟੋ-ਘੱਟ 87 ਮਲਾਹਾਂ ਦੀ ਮੌਤ ਹੋ ਗਈ। ਹਾਲਾਂਕਿ, ਸ੍ਰੀਲੰਕਾ ਦੀ ਮਦਦ ਨਾਲ 32 ਲੋਕਾਂ ਨੂੰ ਬਚਾ ਲਿਆ ਗਿਆ ਹੈ। ਭਾਰਤੀ ਨੌਸੈਨਾ ਨੇ ਵੀ ਤੁਰੰਤ ਕਾਰਵਾਈ ਕਰਦੇ ਹੋਏ ਬਚਾਅ ਕਾਰਜਾਂ ਲਈ INS ਤਰੰਗਿਨੀ ਅਤੇ INS ਇਕਸ਼ਾਕ ਨੂੰ ਤਾਇਨਾਤ ਕੀਤਾ ਹੈ।

ਇਰਾਨ ਨੇ ਇਸ ਹਮਲੇ ਦੀ ਸਖ਼ਤ ਨਿਖੇਧੀ ਕੀਤੀ ਹੈ। ਮੁੰਬਈ ਵਿੱਚ ਇਰਾਨ ਦੇ ਕੌਂਸਲ ਜਨਰਲ ਸਈਦ ਰਜ਼ਾ ਮੋਸਾਯੇਬ ਮੋਤਲਾਗ ਨੇ ਕਿਹਾ, "ਅਮਰੀਕੀ ਪਣਡੁੱਬੀ ਨੇ ਬਿਨਾਂ ਕਿਸੇ ਚੇਤਾਵਨੀ ਦੇ ਅਚਾਨਕ ਹਮਲਾ ਕੀਤਾ, ਜਿਸ ਨਾਲ ਜਹਾਜ਼ ਵਿੱਚ ਧਮਾਕਾ ਹੋ ਗਿਆ। ਇਸ ਘਟਨਾ ਵਿੱਚ ਸਾਡੇ ਲਗਭਗ 100 ਤੋਂ ਵੱਧ ਬਹਾਦਰ ਸਿਪਾਹੀ ਸ਼ਹੀਦ ਹੋ ਗਏ ਹਨ।"